Berriz ere, bost minutugatik laugarren

Tolosaldeko Ataria 2018ko abu. 5a, 19:57
Ane Iturria Alzate, aurtengo Zumaia Flysch Trail proban.

Ane Iturriak, gaur jokatu du bigarren eta azken proba 23 urtez azpiko munduko txapelketan. Ostiralean bezala, gaur ere, podiumetik bost minutura geratu da Alpino Uzturreko tolosar gaztea, 15 kilometroko Gran Sasso Sky Race-Trofeo Piergiorgio De Paulis lasterketan.

Ane Iturria Alzate, Alpino Uzturre elkarteko lasterkari tolosarra, Espainiako 23 urtez azpiko selekzioarekin, mendi lasterketen munduko txapelketa jokatzen aritu da egunotan Italian, Fonte Cerreton. 16-17 urte bitarteko emakumeen mailan aritu da lehiatzen, eta bi proba jokatu ditu Apeninoetan barrena.

Ostiral arratsaldean jokatu zuen bi lasterketa horietako lehena, kilometro bertikaleko modalitatekoa. Orduan, laugarren postua lortu zuen, brontzezko domina irabaztetik bost minutura geratu zelarik. Gaur, berriz, posturen bat aurreratzeko aukera zuen arren, Sky modalitateko proban ere laugarren izan da. 15 kilometroko ibilbidea osatu behar zuten, bataz besteko 1.400 metroko maldarekin.

Iturriak, 2 ordu baino gehiago behar izan ditu ibilbidea osatzeko: 2:37:35. Gaurko proban, gainera, kilometro bertikalean bezala, Aneren taldekide Laia Gonfaus kataluniarra izan da garaile, 2:28:53ko denbora eginda; eta ostiralean gertatu bezala, podiumeko gainerako bi postuak, Andrea Sinfreu andorratarrarentzat eta Luca Nemeth hungariarrarentzat izan dira. Sinfreuek  2:31:39an geratu du denbora, eta Nemethek, aldiz, 2:32:19an. Gauzak, beraz, oso estu egon dira amaieran, bi korrikalari hauen artean.

Iturriak Ataria-ri azaldu dionez, ostiralean ez bezala, gaur gozatu egin du: "Oso ondo sentitu naiz, eta sentsazio onak izan ditut lasterketa guztian zehar". Aurrerantzean, bertako nahiz kanpoko lasterketak prestatzen eta lehiatzen jarraituko du, baina oraingoz, argi utzi du, gaztea izanda ere, lasterka ederki aritzen dela.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!