Ane Iturria tolosarra 23 urtez azpikoen mendi lasterketen munduko txapelketa jokatzen ari da egunotan L'Aquilan (Italia), Espainiako Selekzioarekin. 16-17 urte bitarteko emakumeen mailan ari da lehiatzen, eta bi proba jokatuko ditu Apeninoetan barrena.
Gaur arratsaldean jokatu du bi lasterketa horietako lehena, kilometro bertikaleko modalitatekoa. Eta gisa honetako txapelketa batean selekzioarekin parte hartzen duen lehen aldia den arren, gutxigatik ez du lortu domina bat estreinaldian.
3,5 kilometro eta 1.000 metroko malda gainditu ostean, laugarren amaitu du lasterketa, ordubete eskaseko denbora eginda: 1:00:13.7. Laia Gonfaus kataluniarra izan da garaile, 52:46ko denbora eginda. 28 segundo beranduago helmugaratu da Andrea Sinfreu errumaniarra, eta Luca Nemeth italiarrak osatu du podiuma, 55:42ko denborarekin.
Alpino Uzturreko lasterkariak Ataria-ri azaldu dionez, ez da gustura sentitu lasterketan: "Ez ditut sentsazio onak izan, ez naiz ondo sentitu. Baina tira, lasterketa oso polita izan da eta giroa ere bai".
Igandean izango du sentsazio onak berreskuratzeko bigarren abagunea, orduan jokatuko baitu Munduko Txapelketako bigarren proba, Sky modalitatekoa. 15 kilometroko ibilbidea osatu beharko dute, eta malda 1.400 metrokoa izango da bataz beste.