2013. urtean 100 urte bete zituen Tolosako Udal Txistulari Bandak sanferminak girotzen. Urte horretan ere omenaldia jaso zuen bandak.
Bada, urte horien ia erdia darama Iñaki Letamendiak Iruñera joaten. 1968. urtean joan zen, lehenengoz, 15 urte zituela, Miguel Martinez de Lecea txistulariarekin. Hori dela eta, Iruñeko Udalaren eta Iruñeko Udal Txistulari bandaren omenaldia jaso zuen atzo eguerdia, musikari eskainitako guztiagatik.
Joseba Asiron alkatearen eskutik jaso zituen opariak: Iruñeko Udalaren zapi gorria eta Caravinagre buruhandiaren oroigarria. Bi banden arteko laguntasuna goraipatu zuten omenaldian.
Bertan izan ziren, besteak beste, Olatz Peon Tolosako alkatea, eta Nerea Letamendia eta Maite Ruiz de Eguilaz zinegotziak.
