Kalitatea kontu segurua izan ohi da Tolosandblues jaialdian, eta horri eguraldia eta ikusleen grina gehituz gero, koktelak ezin du perfektuagoa izan. Ostegunean ekin zioten jaialdiari, Tontokalen, Serious Business taldearen emanaldiarekin, eta ofizialki asteburua hasteko, bi hitzordu izan zituzten, atzo, blues zaleek.
Lehena Ilargi tabernaren atarian izan zen, Tófol Martinezen hirukoarekin. Bateriak, teklatuek eta gitarrak publikoa maitemindu zuen, eta inork gutxik utzi zuen kamera poltsikoan, zatitxoren bat grabatzeko. Gaur, berriro izango da hirukoaz gozatzek aukera, 13:00ean, Karela tabernaren atarian.
Gauean, berriz, Euskal Herria plaza lapiko bat bilakatu zen, Annika Chambers abeslariaren eta bere taldearen eskutik. Chambersen ahotsak eta erritmoak harrapatu zituen ikusleak, eta bisetara bitarte, jendea ez zen lehen lerrotik mugitu.
2018ko Tolosandblues-ek asko du, oraindik, emateko eta, besteak beste, Laurence Jones gazteen kontzertua izango da, gaur, 22:30ean, Plaza Berrian; aurtengo izartzat jo zituzten aurkezpenean.