21:30. Amarotz Auzoa. Ilargi beteak auzoa argitzen duen bitartean, amaitzear da Mago Diego, Imanol Ituño, Barbara Rivas, Pello Añorga eta Coco Barrazaren Pintxopoteatroa ikuskizuna.
Bat-batean alfonbra gorria jarri dute auzo lokalen sarreran, eta alfonbraren bi aldeetan bildu dira magoak, txotxongilolariak, trapezistak, mimoak, ipuin kontalariak, zirkuko protagonistak, pailazoak, bertsolariak, idazleak, antzerkilariak... Ezustean harrapatu dute May Gorostiaga.
- Baina zer da hau?
- Merezitako omenaldia, zuretzat.
Zinta moztu, eskuak lurrean marraztu... Modu horretara, emozio biziz eta txalo artean, May Gorostiagak egiten duen lana eskertu nahi izan dute auzokide eta lagunek Amarozko Antzerki Astearen 20. urteurrenean. Hitz goxoek erabat hunkitu dute, auzoko zapia eta txapela jantzita daramatzan May.
«Merezi du, gure maisua da, eta 20 urteko ibilbide honetan sekulako lana egin du. Bere alboan egotea zoragarria da, ideia mordoa duelako, eta beti gertu izaten dugulako. Diru-laguntzarik gabe egiten den antzerki astea da, eta antzerki astea aurrera ateratzeko Mayk egiten duen lana izugarria da», azaldu dute omenaldia prestatu duten lagunek.
Ezin ahaztu Bea Larrañaga eta Irantzu Mantxoz. Mayren alboan antzerkia sortzen urteak daramatzate biek eta merezitako lore sorta bana jaso dute beraiek ere.
Ezin emozioak alde batera utzi. Urrun baina gertu dauden lagunek prestatutako bideo proiekzioak barreak eta negarrak sortu ditu. Azken mezu bat ere badute guztiek: May, jarrai ezazu ibiltzen, eta ez utzi zure hegoak astintzeari. Beste 20 urteren bila. Maite zaitugu!