Tolosako Udalaren eta Tolosa&Co elkartearen arteko «lankidetzarako eremu egonkor bat sortzea» da hitzarmenaren helburu nagusia, udalerriko garapen ekonomikoan eta enpleguan, merkataritza, zerbitzuak eta ostalaritza «giltzarri» direla iritzita.
Tolosako Udalak merkataritza eta ostalaritzari bultzada ematen jarraitu nahi duela adierazi du: «Tolosa&Cok sektore komertziala, zerbitzuena eta ostalaritzarena bere osotasunean batzen eta ordezkatzen ditu, eta entitate erreferente da», aitortu du Olatz Peon alkateak.
Peonen ustez, Tolosa&Corekin elkarlanean jardutea «ezinbestekoa» da: «berrikuntza bultzatu, era koordinatuan proiektu amankomunak martxan jarri, eta azken finean, sektorearen beharrei erantzungo dieten jarduerak elkarlanean garatu behar ditugu».