«Bere munduan, egunerokoan, erosotasunean sartuta dagoen emakumea da», dio Bea Larrañagak. «Berak, ordea, hortik atera nahi du, ilusio du, baina, beldur da, muga ugari baititu bere ametsak errealitate bihurtzeko».
Larrañagak dioenez, gure egunerokoan maiz gertatzen zaigu hori: «Edozer gauzetan gertatzen zaigu, esaterako, ez gara ausartzen norbait maite dugula esaten; mugak jartzen dizkiogu gure buruari, lotsa, beldurra sentitzen dugu. Antzezlanaren ideia da beldur eta lotsa horiek alde batera uztea, ez garela perfektuak ulertzea». Hori guztia etxe aldatze batekin irudikatuko dute taula gainean.
Clown ikuskizuna da Ana Perezek zuzendutako lana. «Ikuslearekin harreman berezia dago, horretan desberdintzen da emanaldia». Amarotzen egin zuten aurrestreinaldia, eta izan zuen harrera oso ona izan zela azaldu du Larrañagak.
