Irigoien-Herrero, Aburuza, Zabala, Isastegi eta Oiharte eskualdeko sagardogileena izan zen, otorduan, bertako jakiei zapore berezia ematearen ardura. Formula erraza bezain dastagarria baliatu baitzuten, atzo, bisiguaren eta sagardoaren asteburuari ekiteko: bertako edaria eta bertako produktuak, elkarrekin.
50 pertsona inguru elkartu ziren, Txinparta elkartean, mahaiaren bueltan, eta txorizoa eta urdaiazpikoa, Nafarroako orburuak, sagardo sorbetea, urdetxe xolomoburua, gazta dastatzea eta Rafa Gorrotxategiren gozoa dastatu zituzten.
Asteburuko hitzorduetan hitzorduena hasi besterik ez da egin eta, gaur, 19:00etan, Oinkari eta Hikaren Sagartu ikuskizunaz gozatzeko aukera izango da. Jarraian, Sagardoa bidegile dokumentala proiektatuko dute Topic zentroan, eta bisiguaren menuak hartuko du erdigunean, afalorduan. Oraindik ere txartelak salgai dira, Tolosaldea Tour-en.
