Asteburuan disgustu bat jasotzeko zorian izan zen Tolosa. Teorian neurketa erraza zirudien. Vasconia, azken aurreko sailkatuaren zelaian jokatu behar zuten urdinek, baina maila honetan ez dago ezer irabazita jokatu aurretik. Eta argi geratu zen edonork edonori irabazi dakiokela.
Donostiarrentzat mailari eusteko aukera bakarra neurketa hori irabaztea zen, eta ez zituzten gauzak erraz jarri. Ausart zelairatu zen etxeko taldea, eta haien aldekoak izan ziren gol aukerarik onenak. 35. minutuan, esaterako, langarekin topo egin zuten. Tolosarrak, ordea, sendo izan ziren defentsan.
Asko zegoen jokoan Puion, eta ez bata ez bestea ez zegoen konforme huts eta hutsekoarekin. Azken 10 minutuetan goitik behera aldatu zen neurketa, erasora jo baitzuten bi taldeek.
Tolosa izan zen saria topatu zuen lehena: Bereziartuak aurretik jarri zituen tolosarrak 83. minutuan. Bost minutu beranduago, 88.ean, Martinek berdinketa itzuli zuen markagailura. Kolpe horri segituan eman zion buelta Avellanedaren taldeak, Guijarrok bigarrena egin baitzuen minutu bat beranduago. 1-2, saria Tolosarentzat, eta jaitsiera Vasconiarentzat.
Hiru neurketa besterik ez dira falta denboraldia amaitzeko, eta aurkariek ez dute hutsik egin oraingoan ere. Ordiziak Mondraren aurka 3-0 irabazi zuen, eta Pasaiak 1-4 hartu zuen mendean Hondarribia.
Asteburuan, Añorgaren aurka jokatuko du Tolosak, Berazubin. Ordiziak Hondarribiaren aurka neurtuko ditu indarrak, eta Pasaiak, berriz, Mutrikuren aurka etxetik kanpo. Ea ba oraingoan.
| Pos. | Taldea | Puntuak | JP | IP | BP | GP | EA | AT | KT |
|---|---|---|---|---|---|---|---|---|---|
| 1 | ORDIZIA K.E. | 66 | 31 | 20 | 6 | 5 | 0 | 69 | 17 |
| 2 | TOLOSA C.F. | 63 | 31 | 19 | 6 | 6 | 0 | 63 | 29 |
| 3 | PASAIA K.E | 63 | 31 | 19 | 6 | 6 | 0 | 54 | 31 |
| 4 | HERNANI C.D. | 61 | 31 | 18 | 7 | 6 | 0 | 57 | 21 |
| 5 | ZARAUTZ K.E. | 55 | 31 | 17 | 4 | 10 | 0 | 52 | 36 |
| 6 | MONDRAGON C.F. | 53 | 31 | 15 | 8 | 8 | 0 | 45 | 30 |
| 7 | BERGARA K.E. | 51 | 31 | 14 | 9 | 8 | 0 | 44 | 29 |
| 8 | AMAIKAK BAT K.E. | 43 | 31 | 12 | 7 | 12 | 0 | 46 | 44 |
| 9 | ARETXABALETA K.E. | 41 | 31 | 10 | 11 | 10 | 0 | 33 | 30 |
| 10 | MUTRIKU F.T. | 41 | 31 | 11 | 8 | 12 | 0 | 53 | 46 |
| 11 | REAL UNION CLUB SAD | 40 | 31 | 11 | 7 | 13 | 0 | 35 | 35 |
| 12 | BETI GAZTE K.J.K.E. | 37 | 31 | 10 | 7 | 14 | 0 | 40 | 50 |
| 13 | OIARTZUN K.E. | 36 | 31 | 9 | 9 | 13 | 0 | 35 | 37 |
| 14 | AÑORGA K.K.E | 34 | 31 | 8 | 10 | 13 | 0 | 37 | 45 |
| 15 | HONDARRIBIA F.E | 33 | 31 | 8 | 9 | 14 | 0 | 37 | 53 |
| 16 | UROLA K.E. | 28 | 31 | 6 | 10 | 15 | 0 | 34 | 53 |
| 17 | VASCONIA C.D. | 22 | 31 | 5 | 7 | 19 | 0 | 41 | 67 |
| 18 | TOURING C.D. | 3 | 31 | 0 | 3 | 28 | 0 | 11 | 133 |