Tolosa Eskubaloiak jokoan du sailkapeneko bigarren postua. Hirugarren dira uneotan, eta bi puntura du Anaitasuna bigarren sailkatua. Hain zuzen, bi taldeak nor baino nor gehiago arituko dira asteburu honetan, Tolosan, 19:00etatik aurrera.
Urdinak azken bost neurketak irabaztetik datoz. Hain zuzen, galdu zuten azken neurketa liderraren aurkakoa izan zen. 23-24 gailendu zen Dominicos Zaragoza Usabalen, eta orain bost puntura daude Aragoikoak.
Bigarren postu hori du jomugan Tolosak, eta horri heldu nahi badio, ezinbestekoa izango du garaipena. Joanekoan 36-28 galdu zuten Tolosarrek Anaitasunaren aurka, eta averagea aldeko jartzea oso zaila den arren, ez diote ezeri uko egiten. Bigarren postua eskuratuko balu, igoera fasea jokatzeko aukera izango luke Tolosa Eskubaloiak.
Hori lortzeko, ordea, zaleen laguntza eskatu du taldeak. "Herritarren berotasuna ezinbestekoa izango da, horregatik jokalariok marea urdinari dei egiten diogu, Usabalera joateko, harmailak bete eta taldeari bultzada bat emateko".