Boolo hitzak 'taldea egin' esan nahi du. Bada, izen bera daraman elkarteak, eskualdean eta inguruetan bizi diren Senegalgo herritarrak bildu zituen larunbatean, taldean, beren herrialdearen independentziaren 57. urteurrena ospatzeko. Tolosarrak ere gerturatu ziren Kultur etxera, tartean, Olatz Peon alkatea, eta Patxi Amantegi eta Maite Ruiz de Eguilaz zinegotziak ere.
Senegalgo ereserkia entzunez hasi zuten ekitaldia, eta ondoren, Abdoulaye Gueye, Caritas Gipuzkoako abokatuaren hitzaldia izan zuten. Etorkinen gizarteratzerako erronka nagusien inguruan aritu zen hizketan, eta inguruko errealitate soziala aztertu zuen.
Hain zuzen, paperena da eskualdeko Senegalgo komunitateak duen arazorik handiena: "Paperik gabekoek ez dituzte bermatuta beren eskubideak", azaldu zuen Peonek. Bide batez, horrelako ekintzak "ezinbestekoak" direla gaineratu zuen Tolosako alkateak: "Kultur aniztasuna lantzeko garrantzitsua da ez bakarrik beraiek euskal kultura ezagutzea, baizik eta euskaldunok beraiena ere ezagutzea. Horrela bizikidetza errealago bat sortuko da".