Euskal Herri osotik etorritako 16 mintegi egongo dira larunbat honetan Trianguloa plazan egingo den lore eta landare azokan, tartean, Anoetako bi: Urkizu eta Zurlan. Urtarriletik martxora bitarteko bigarren eta laugarren larunbatetan Atadi kalean izaten diren Arakama eta Dorronsoro mintegiak ere Tolosan izango dira, baina ez ohiko lekuan, Trianguloan baizik.
08:00etan jarriko dituzte postuak, eta 14:00ak arte egongo dira bertan. Produktu anitz aurkitzeko aukera izango da. Fruta arbolak (limoiondoak, laranjondoak, sagarrondoak...) baso landareak (pinuak, pagoak, haritzak...), apaingarriak, zuhaixkak eta zuhaitzak izango dira.
Mintegietako arduradunek bertaratzen direnen galderak eta kezkak erantzungo dituzte, landare eta zuhaitzak ikusi eta erosteaz gain, hauen inguruko zalantzak galdetzeko egun aproposa baita.
Eguna borobiltzeko, hazi eta landareak landatzeko tailerra eskainiko du Blasenea mintegiak, 11:00etatik 12:30era, Trianguloa plazan.
Herriko beste hainbat gunetan ere bertako produktuak erosteko aukera izango da. Zerkausiaren inguruko baserritarrek urte garaiko produktuak izango dituzte: azaloreak, brokoliak, bruselako azak, eta eskarolak. Berdura plazan, loreak eta landare haziak, eta Euskal herria plazan era guztietako produktuak eskainiko dituzte.
Azokan parte hartuko duten mintegien zerrenda:
- Arakama anaiak: Zegama (Gipuzkoa)
- Aranburu: Aginaga (Gipuzkoa)
- Areitio: Zaldibar (Bizkaia)
- Belar: Zaldibar (Bizkaia)
- Blasenea: Zarautz (Gipuzkoa)
- Dorronsoro: Ataun (Gipuzkoa)
- El montañes: Tafalla (Nafarroa)
- Guillen: Pueyo (Nafarroa)
- Urkizu: Anoeta (Gipuzkoa)
- Txomin Bilbao: Kortezubi (Bizkaia)
- Artadi: Igorre (Bizkaia)
- Sairu loreak (Urtinea): Usurbil (Gipuzkoa)
- Zurlan: Anoeta (Gipuzkoa)
- Zubialde: Beintza-Labaien (Nafarroa)
- Lurberry: Zarautz (Gipuzkoa)
- Ortuberri: Iurreta (Bizkaia)