Tolosako inauterietan jai giroa jarri izan duen Berazubi auzoko karroza omendu du Kabi Alai elkarteak eta ohiko umorea erakutsi dute bertako kideek goizean goizetik. Plaza Berrian dagoen elkartean gosaldu eta kalejiran gerturatu dira udaletxera.
Aurretik, ordea, 'Mannequin Challenge' delakoa egin dute. Dantzariak, udal korporazioa, txaranga, inauterizale kuttunak... bakoitzak bere posizioa hartu du eta pare bat minutuz mugitu gabe izan dira, izoztuta geratuko balira bezala. Sorpresaz harrapatu dituzte Plaza Berrian zeudenak, eta amaitzean, txaloak jaso dituzte.
Txupinazoaren orduan parodia egin ondoren, festa giroan jarraitu dute kalez kale.