[Gutuna] Inauteriak iritsi direla jakin dugu...

Goiz samar iritsi dira festak aurten eta berandu, oso berandu, jaso dugu inauteriei buruzko informazioa EH Bilduko hautetsiok. Harrigarria iruditzen zaigu inauterietako egitaraua bera, udaleko webgunean ikusita ezagutu behar izatea; edo udalak duen aurrekontuaren berri ez izatea, festen aurretik. Gaur-gaurkoz, ez gaituzte,  inauterien aitzakian, bilera bakar batera ere deitu. Pentsa, Leonen ere guk baino lehenago ikusi dute inauterietako programazioa! Izan ere, inauterietako egitaraua Leongo enpresa batek egin du aurten, lan hori egiteko prest dauden hamaika enpresa gure artean dauden bitartean.
Jakin badakigu karroza, konpartsa, txaranga, danborrada edota aisialdi taldeen kolektiboekin bilerak egin dituela udal gobernuak; talde bakoitzarekin bere aldetik. Baina, jai bilerak? Non geratu dira lehen Jai batzordea izenarekin ezagutzen genituen bilera haiek? Aipatutako kolektibo horietako kide direnek eta ez direnek, ez al dute merezi plazarik, inauteriei buruz denok elkarrekin hausnartzeko?
Lehen ere aipatu dut inauteriak urtea hasi eta berehala iritsi direla. Horrek, prestaketa lanak aurreratzea eskatzen du. Aurten, ordea, konpartsek eta karrozek inoiz baino beranduago jaso dituzte Ferialekuko eta Usabalgo pabiloietako giltzak. Beste urteetan abendu hasierarako jasotzen zituzten eta, aurten, abendua amaieran eta Eguberri ostean banatu dizkiete. Hori ere beranduegi.
Herritarrok egiten dugu inauteria, eta udalak jartzen ditu horretarako bitartekoak. Udal gobernuan ez gauden zinegotziok, baina, ez gara konturatu inauteriak gainean ditugunik, udalaren bitartez behintzat. Eskerrak, egutegian ondo markatuak izaten ditugun. Ondo pasa inauteriak!

Igor Ezenarro,  EH Bilduko zinegotzia