Duela 3 urte, San Ferminetan sari bat irabaztearekin batera, lehen disko bat argitaratu zuen Kalean Txarangak. Emaitzarekin gustura geratu ziren, eta 5. urteurrena biribiltzeko bigarren disko bat argitaratzea erabaki dute.
Disko "pertsonalago" baten aldeko apustua egin dute oraingoan, eta rock doinuen batera, euskal taldeen kantu ezagunak bildu dizute lan berrian: Fermin Muguruza, Gatibu, Etzakit... "Kalean arrakasta gehien duten diskoak dira, eta taldearen izaera eta indarra trasmititzen dute", azaldu du Iñigo Alustiza txarangako kideak.
Disko berria Andoaingo Garate estudioan grabatu dute eta emaitzarekin "oso harro" daudela gaineratu du Alustizak: "Oso azkar igaro dira 5 urte hauek, baina ilusio eta gogo handia genuen taldekide guztiok".
Lan berriaren aurkezpena bihar bertan egingo dute, Tolosan. 11:30ean Xirimiri Kafetegitik irtengo dira kalejiran, eta bazkal ordura bitarte alde zaharrean barrena ibiliko dira. Arratsaldean ere, 19:30etik aurrera, kalez kale arituko dira. Aipatzekoa da, Frantziara bidaia ugari egin dituztela denbora honetan, eta han bertan egindako bi lagunek ere hartuko dute parte biharko emanaldian.