Hamar urte bete zituenean kaleratu zuten 'Bonberenea hamar urte bizirik' liburuaren jarraipena da aurkeztu berri dutena. Testuen ardura Urki Kolinas Bonbereneako kideak izan du, baina, berak esan moduan, "Bonbereneako beste hainbat ekimenekin egiten den moduan, elkarlanean eginiko lana da".
Bada, lehen liburuaren jarraipena den heinean, azken hamarkada da, bertan, batik bat, kontatzen dena. Hain juxtu, alde handiak nabaritu ditu Kolinasek bataren eta bestearen artean: "Lehen hamarkadan garai nahasiak ziren: hiru okupazio, bi desalojo, erakundeekin eztabaidak... eta bigarren hamarkadan, berriz, erakundeekin harremana ez da hain tirabiratsua izan".
Giro "lasaiago" horri esker uste du Kolinasek ekoizpena handiagoa izan dela azken urteetan: "Guk nahi duguna egiteko, hau da, kultura egiteko, giro aproposagoa izan dugu". Eta datuak ere eman ditu hori erakusteko. Izan ere, lehen hamarkadan 200 kontzerturen bueltan ibili baziren, bigarrenean 800 zuzeneko bueltan ibili dira. Diskoen ekoizpena ere handiagoa izan da bigarrenean, "eta horrekin batera, baita kalitatea ere".