Tolosa&Co elkarteko merkatariekin batera, Tolosako Udalak aurtengo Eguberrietako argien piztea egin zuen atzo, Trianguloa plazan. Urteroko moduan, haur eta gaztetxoei lilura eragin zieten animalia argiztatuek, eta hainbat argazkitarako dekoratu bilakatu zen Gaztelako arkupea.
Kaleko gabon-argiak ezartzeko lanak duela zenbait aste hasi zituzten Tolargiko langileek eta, guztira, 50 egitura ezarri dituzte herrian barrena. Bolak, konoak eta zuhaitz txikiak baliatu dituzte apaingarri lanetarako, eta San Frantzisko pasealekua, Araba etorbidea, Alde Zaharra, Larramendi, Amarotz auzoa, Lopez Mendizabal plaza, Iurre auzoa, Montezkue auzoa, Gernikako arbola, Emeterio Arrese, Zumalakarregi etorbidea, Solana, Rondilla kalea, Belate, Bedaio, Urkizu eta Aldaba auzoak apaindu dituzte festa egunetarako. Era berean, udaletxea, musika eskola eta kultur etxea ere argiztatuta izango dira Eguberrietan.
Aipatzekoa da, Kale Nagusiko eta Errementari kaleko merkatarien ekimenez, datorren astean piztuko dituztela bertan argiak. Urtarrilaren 7ra bitarte, beraz, Eguberria argitan izango da Tolosan.