ELA eta LAB sindikatuek osatutako langile batzordeak hainbat protesta iragarri ditu aste honetan. Lehenengoa gaur bertan burutu dute; elkarretaratzea egin dute Trianguloan. Abenduaren 13an izango dute hurrengo hitzordua, lau orduko lanuztea egitea adostu baitute. Asuncion klinikako langileek ez dute hitzarmena berritu 2010. urtetik.
ELA sindikatuko idazkaritzako arduradunak Oria-Goierrin, Alazne Mantxolak, esan du langileen eta zuzendaritzaren azken bilera azaroan egin zutela, eta ez zutela aurrera pausorik eman. "Soldatak %1 igotzea erabaki zuen, aldebakarrez, eta ez besterik. Gure eskaerak gehiago dira", esan du.
Sindikatuek gogoratu dute 2010etik soldata berak dituztela eta beraz, zazpi urte hauetan 3.000 eta 5.000 euroko galerak izan dituztela oinarrizko soldatetan. Bestalde, lanaldia murriztu beharraz ere hitz egin dute. "Asuncion klinikako langileok urtean 1.670 ordu egiten ditugu lan, eta Osakidetza eta alor horretako hainbat enpresa pribatutan 1.592 ordu egiten dituzte". Hau da, Asuncioneko langileek Osakidetzan baino 78 lanordu gehiago egiten dituzte.
Klinikako medikuak joaten ari direla ere aipatu dute. "Lan baldintza txarrak dituzte, prekarizazioaren adibide argia da", esan du Mantxolak. Zehazki traumatologiako lau mediku joan dira Asuncionetik.
"Enpresako zuzendaritzak bermeak eta edukiak izango dituen hitzarmen bat negoziatzea nahi dugu", esan dute.
