Titirijairekin eta Hondakinen Prebentziorako Europar Astearekin bat egiten, bi esparruak bateratu dituzte Tolosako Ekinbide Etxeak eta aldundiko Ingurumen sailak, BizitzeEKO! kanpainarekin: haur eta gaztetxoei hondakinak behar bezala sailkatzen eta ingurumenaz hausnartzen irakatsiko diete, txotxongiloen mundutik.
Jose Ignacio Asensio eta Idoia Otegi izan ziren aldundiko agerraldian, Topic zentroko hezitzaileekin batera eta, azaldu zuten, datorren igandean ekingo diotela egitasmoari, 11:00etan. 8 urtetik gorako haurrei begirako proiektua da BizitzEKO!, eta Hondakinen erreinuaren bitartez jasoko dute informazio guztia: "Ibilbidean barrena lau erreinu ezagutuko dituzte: paperarena, ontziena, errefusarena eta organikoarena. Erreinu horiek hondakinez eginda daude eta, beraz, haurrek ikusi ahal izango dute hondakin bakoitza zein koloretara bota behar duten", azaldu zuten.
Erreinuak Topic zentroko arkupeetan ezagutu eta gero, museo barruan Mariona txotxongiloak hitz egingo die haurrei, bideo baten bitartez; argibideak emango dizkie, hondakinak murrizteko, berrerabiltzeko nahiz birziklatzeko.
Jose Ignacio Asensio ingurumen diputatuak haurtzaroko hezkuntzaren garrantziari jarri zion azpimarra: "Txikitan eskuratzen ditugun balioak dira, helduaroan mantentzen ditugunak. Horregatik, gure erantzukizuna da haurrei ohitura jasangarriak helaraztea".
Aipatzekoa da, Topic zentroko saioak amaitu eta gero, ikastetxeek jarraitu ahal izango dutela hondakinei buruzko lanketarekin, on-line tailer baten bitartez.