Memoriaren Eguna dela eta, Tolosako udalbatzak bost minutuko elkarretaratzea egin du udaletxe aurrean; horretaz gain, Euskal Pizkundea plazan dagoen monolitoan lore eskaintza ere egin dute.
Adierazpen instituzionala ere onartu dute Tolosako udala osatzen duten alderdi politiko guztiek: "Konpromisoa hartzen dugu bizikidetzaren eraikuntzan gure herriko memoria berreskuratzeak duen garrantzia gizarteratzekoa".
Azaldu dute bizikidetza eraikitzea "eguneroko" lana dela: "Etorkizuneko bizikidetzaren oinarri sendoak finkatzeak suposatzen du elkarlana eta batzen gaituen hori aztertzea", jasotzen du adierazpenak.
Zentzu horretan, azpimarratu dute "euskal gizarteak bizi izan dituen eta bizi dituen egoera zail guztiak bere konplexutasunean aztertu beharrean daudela, errealitate anitzei erreparatu eta erantzun bateratuak emateko gai izan gaitezen".
Tolosako Udalak biktima guztiak aitortzen ditu adierazpenean: "Giza eskubideen urraketak pairatu zein pairatzen dituzten pertsona guztiak gogora ekarri eta aitortu nahi ditugu". Era berean, Tolosako Udalak aldarrikatu du udalari dagokiola gertatutakoa berriro ez gertatzeko "beharrezko urratsak egitea eta oinarri sendoak finkatzea. Aurrerantzean, hori izango da gure konpromisoa".
