Beste zenbait udaletan bezala, Tolosan ere Kataluniara begira jarri ziren iraileko osoko bilkuran, erreferendumaren hitzorduagatik eta hark harrotutako hautsagatik. Horrela, Tolosako udalbatzako gehiengoak –EAJk eta EH Bilduk– mozio bateratua onartu zuten, Kataluniari babesa eskainiz eta Espainiako Gobernuaren aldetik jasotako errepresioa salatuz.
Bada, Kataluniatik bueltan iritsi zaie begirunea, Carme Forcadell Parlamenteko presidenteak eskerrak helarazi baititu, gutun bitartez. Ele bietan idatzitako gutunean, Parlamentak "oso modu berezian baloratzen du" jasotako babesa, eta nabarmendu dute horrek indartzen duela beren zilegitasuna.
Horrela, errepresioa eta jazarpena irmoki salatuz, eskaera batekin amaitu du gutuna, Forcadellek: "Ausartuko naiz eskatzera, epe Laburrean Kataluniako gertakariak arretaz jarraitzeko. Zuen laguntza ezinbestekoa da bakea, demokrazia, askatasun zibilak eta oinarrizko eskubideak bermatzeko":