"Ni Jose Maria Agirre naiz, goitizenez Lizardi, eta eguzkia neguaren irribarrea dela esaten dut (...)". Halaxe ekin zion emanaldiari, Kepa Errasti aktoreak, Xabier Lizardiren azalean sartuta. Harekin batera, Igor Estankonak, Karlos Linazasorok eta Ione Gorostarzuk jarri zituzten hitzak, Xabier Lizardirenen ondoan. Musika, berriz, Juantxo Zeberio eta Elene Arandiaren esku eta ahotsetik iritsi zen, errezitaldia biribiltzeko.
Aitzakia bera ere biribila izan baitzen: Tolosako Lizardi elkarteak 50 urte bete ditu, eta ospakizunen irekiera literaturaren bidetik egin dute elkarteko kideek, izenari men eginez. Topic aretoan ehun bat pertsona elkartu ziren, urtemuga ospatzeko, eta aspaldiko hitzek eta gaur egungoek elkarrekin eskutik bikote ederra osatzen dutela ikusteko.
Elkarteak ostiralean jarraituko du egitarauarekin, eta larunbatean izango da mende erdia ospatzeko egun handia, festaz.