Emanaldi «ikusgarria» Topic zentroko fatxadan

Tolosako Ekinbide Etxearen 50. urteurreneko ospakizunen barruan, ekitaldi berri bat egingo dute bihar gauean. Videomapping izeneko teknikaren bidez, Topic zentroko fatxadan azken 50 urteetako irudiak proiektatuko dituzte, musikaren laguntzarekin. Idoia Otegi Topic zentroko zuzendariak azaldu duenez, ikuskizun «ikusgarria» izango da: «Gipuzkoan eta uste dut Euskal Herrian ere ez da horrelakorik egin».

Otegik nabarmendu du ikuskizuna osatzeko bertako egileekin egin dutela apustu. «Orain arte ikusi duguna asko gustatzen zaigu eta ea animatzen diren herritarrak Euskal Herria plazara etortzera emanaldiaz gozatzeko. Ilusio handia egiten digu, bai emanaldia osatzen ari diren egileei bai TEEko parte garenoi ere», esan du Otegik. TEEren historiaren irudiak jasotzeaz gain, Tolosako azken 50 urteko irudiak ere jasoko dira Topic-eko fatxadan islatuta.

Emanaldiaren bi saio egingo dira, lehenengoa 22:00etan eta bigarrena 23:00etan. Aurretik, Topic-en bertan afaria izango dute TEE-ko kideek erakundeetako eta babesleen ordezkariekin.