Haurrak lasterka, eta gurasoak hesiaren bestaldean. Tolosako Buruhandi eta Erraldoien Konpartsako kideek jarri dituzte korrika, haurrak, Zabalarreta parkean ospatu den entzierro txikian. Izaskun auzoko festen barruan ospatu da jarduera, eta etxeko txikienek ez dute aukera galdu nahi izan, errekortarien antzera, zezenari deitu eta izkin egiteko.
Gaurkoa, bigarren eguna dute Izaskunen, eta egitarauari dagokionez, larunbata izan ohi da urtero egun beteena. Zezenen ondoren, buruhandien txanda izan da, eta 14:00etan auzo bazkaria egingo dute. Arratsaldean, dantzarako, sagardoa dastatzeko eta bertsolariei entzuteko aukera izango da, gaueko zahagi ardoaren eta kontzertuen aurretik. Ikusi hemen egitaraua.
