Martinek esan duenez, oraindik ez dakite zerk eragin zuen kloro isuria. "Oraindik ez daukagu txosten teknikoa eta zain gaude. Bai esan dezakegula prebentzio lan guztiak betetzen ari garela berriz ere gerta ez dadin, eta jendeari esan nahi diogu lasai egoteko, kiroldegia irekita dagoela, normaltasunez, eta dena kontrolpean daukagula".
Suhiltzaileek eta Osasun saileko langileek atzo arratsaldean eta gauean egin dituzte neurketak, eta esan dutenez gas isuria erabat desagertu da. Guztira 104 pertsona artatu behar izan zituzten atzo, ia guztiei unean bertan eman zieten alta, eta 23 izan ziren ospitaleetara eraman zituztenak. Horietako 20ri atzo eman zieten alta eta hiruk eman behar izan dute gaua bertan. Osakidetzak adierazi duenez, behaketan daude. Asuncion klinikan 44 urteko emakume batek pasa du gaua eta goizean zehar emango diote alta. Beste biak Donostiako ospitalean egon dira; 24 urteko emakume bati proba osagarriak egin dizkiote larrialdietako behaketako unitatean, eta emaitzen zain dago, eta 8 urteko haur bat ama-haurren eraikineko behaketan dago, eta goizean emango diote alta. Tolosako anbulatorioan ere bost pertsona artatu zituzten, lau haur eta heldu bat; guztiei atzo eman zieten alta.
Usabalgo gerenteak eskerrak eman nahi izan ditu era berean: "Eskerrak eta zorionak eman nahi dizkiogu Usabalgo monitore eta sorosle guztiei emandako erantzun azkarragatik, baita erabiltzaileei ere, izandako pazientziagatik. Besarkada potolo bat eman nahi diegu ere kalteren bat pairatu dutenei eta barkamenak eskatzen dizkizuegu emandako sustoagatik, gertaera oso ikusgarria izan baitzen. Gerturatutako anbulantzia, suhiltzaile, udaltzain eta ertzainei ere eskerrak, erantzun azkarra eta ona eman baitzuten".
