Langileen bultzada, euskal preso eta iheslarien aferari

«ETAk su etena iragarri eta bost urte baino gehiago pasata euskal preso eta iheslarien etxeratzerako nolabaiteko blokeoa zegoela» iritzita, langile mugimenduak Ireki ekimena abiarazi zuen pasa den urrian. Sindikatuez harago doan ekimena da Ireki, eta larunbat honetan emango diote amaiera, ikasturte honetan egindako lanari. «Langileen artean zegoen kezka bati erantzuteko ekimen bezala sortu zen Ireki. Zer egin erabakitzerakoan, behar bada ez da biderik originalena, baina sinadura biltze bat egitea erabaki zen. Milaka sinadura bildu ditugu euskal preso eta iheslarien etxeratzea eskatzeko», esan du ekimeneko kide den Haizea Mendiak.

Larunbatean Hego Euskal Herrian langileen artean zenbat sinadura bildu diren argituko dute eta baita nora bideratuko dituzten atxikimendu horiek guztiak. Tolosaldean 2.000 sinadura bildu dituzte. Garrantzitsuena, dena den, sinadura kopurua baino gehiago, ikasturte honetan egindako lana eta atxikipen kanpaina bera direla esan du Mendiak. «Aurrez aurreko lana egin da eta hori ere oso garrantzitsua eta positiboa da», esan du.

EKITALDIA GASTEIZEN

Ez da kasualitatea afera honi irtenbidea emateko ekimena langileen mugimendutik sortu izana, «gai sozialetan ere langileen ekarpen asko eta garrantzitsuak egin izan dituzte eta oraingoan ekarpena egin nahi genuen». Amaierako ekitaldia Gasteizen egitea ere ez da kasualitatea. «Gasteiz langileen mugimenduarekin zerikusia duen hiria da eta amaierako ekitaldia Martxoak 3 plazan egingo da», esan du.