Ikusmina ikusgarria da batzuetan; Tolosako Erraldoi eta Buruhandien Konpartsa kalera irteten den aldiro, adibidez. Beren desfilea luzatzen dute jarraitzaileek, eta dultzaina, danbor, dantza eta panpinak bilakatzen dira, Tolosako neska-mutilen amets.
Bada, gaurtik aurrera, amets horiek egunero etxean ukituko ditu batek baino gehiagok, salgai jarri baitituzte, jada, erraldoien lehen bi panpinak: Domenjon de Andia eta Catalina de Tapia erraldoien miniaturak.
Lore eta landare azokaren hitzordua baliatu du konpartsak, udalaren laguntzaz, estreinaldia plazaratzeko eta, Gernikako Arbolako lorategi efimeroa inauguratu ondoren, Plaza Zaharrera bertaratu dira, panpinak jendarteratzeko. Minutu gutxian, plazako postuan zituzten erraldoiak agortu zaizkie. Oraindik ere batzuk badira eskuragarri, Errementari kaleko Xirimiri kafetegian.
