Duela hiru urte ospatu zuten lehena, Tolosako gazteriarentzat bestelako aisialdi ereduak aldarrikatzeko. Tolosako Gazte Egunak, ordea, geldialdi bat izan zuen iaz, Ezpala Gaztetxearen auziak sortutako soka zela medio. Gaur, gogo berberei heldu diote asanbladako gazteek, festa aldarrikapenarekin uztartuz.
Goizean ekin diote jaiari, altxorraren bila jokoarekin: asanbladak azken urteotan okupaturiko eraikin eta txokoetan ezkutatu dizkiete gakoak. Bitarte horretan, herri bazkarirako jakiak prestatzen aritu dira, asanbladako hainbat kide, Plaza Berriko karpan.
Eguerdia, ordea, rol aldaketek hartu dute, Tolosako Neska Taldearen (TNT) eskutik: drag tailera antolatu dute, gizon eta emakumeen arteko berdintasunean, gizonezkoek euren pribilegioak aska ditzaten. Horretarako, emakumeak mutilen arropa jantzi dute soinean, eta alderantzizkoa egin dute gizonek. Guztia, rol aldaketaz jabetu, eta enpatia giro bat sortzeko, Olaia Uzkudun TNTko kideak azaldu duenez: "Asanbladan bertan, gutxi gara emakumeak, eta kosta egiten da erdigunea hartzea. Berdintasunerako aletxo horietan, gakoa zein den? Gizonezkoek beren pribilegioak ikusi eta askatzea".
Arratsaldean, tailerrak eta kontzertuak izango dira nagusi, goizaldera bitarte luzatuko den festan.
