Izenari bizkar emanez, Tolosako Kale Nagusia bigarren mailako igarobideen zerrendan egon izan da urtetan, komertzioaren gorabeherak tarteko. Plaza Zaharretik Gorriti plazarainoko bideak, ordea, behin batez izandako garrantziaren pisua hartu, eta sormenaren esparruetara bideratu du, merkatari eta bizilagunen eskutik. Aurreko ikasturtean landareekin egin bezala, euskarari gorazarre egiteko baliatu dute, orain, udazkena. Horrela, balkoiak eta hormak baliatu dituzte euskararen zenbait hitz eta esamolde aukeratu eta, kaletarrak ez ezik, kalea ere euskalduntzeko.