Harmailetan, guraso, senide eta lagunak zain zituzten, eta baita taldeko kideak ere, ile, jantzi zein oinetakoz ondo atonduta. Ez zen, ez, ikasturtean barrena jokatu dituzten dozenaka kirol lehia horien antzeko ezer, baina tatamia zapaldu zuten gimnastek ez zuten animo oihurik falta izan.
Bakarka nahiz taldeka, gimnastika erritmiko klasiko edo teknikoenetik hasi, eta dantza saiora hurbiltzen ziren koreografietaraino plazaratu zituzten Usabalen, azken hilabeteotan lan-orduen erakusle. Uda atseden hartzeko baliatuko duten arren, atzoko ekitaldia lanean jarraitzeko beste soka-mutur bat baino ez zen izan Tolosa CF Gimnastika Erritmikoko kideentzat.