Herriko sinboloak identifikatu eta haien inguruan arteaz, matematikez, hizkuntzaz edo musikaz jarduteko, Tolosako Erraldoi eta Buruhandien konpartsa ardatz izan dute, azken hilabeteotan, Hirukide ikastetxeko Haur Hezkuntzako neska-mutilek. Egindako lan horren guztiaren truke, oparia jaso dute, gaur, patioan, pozarren.
Ikasle bakoitzak berrerabilitako materialarekin buruhandi bana egin du, pixkana, gurasoen laguntzaz, eta Hirukideko buruhandi zaharkituak berritzen ere aritu da guraso talde bat. Konpartsako arduradun Iñaki Moyuak Hirukideko jardunaren berri izan zuenean, ordea, sekulako ezustekoa jaso zuela azaldu du Joseba Antxustegietxarte irakasleak, eta bisita egitea proposatu zien irakasleei.
Horrela, haurren txalo eta algara zaparrada eromena izan dira jolastokian, eta eurek ere dantza egin diete panpina erraldoiei.