Artekalea izenarekin bataiatu zuten 2013an Tolosako Kale Nagusia. Ordutik, bertako merkatari eta bizilagunek ekintza ugari burutu dituzte elkarlanean kalea bera dinamizatzeko helburuarekin: mural margoketak, jokoak, musika, erakusketa eta tailerrak...
Oraingoan, bertako produktuez atondu dute kalea. Horretarako, bost baratze sortu dituzte berrerabilitako materialarekin: ontziak, gurpilak, botilak, egurrak... Material horiek txukundu, margotu eta apaindu egin dituzte ondoren, produkturen bat landatu aurretik: letxugak, tipulinak, tomatea, marrubiak, perrexila, kalabaza... Lizardi elkartearen azpian, baratze horietako batean Xabier Lizardiren olerki bat ere jarri dute.