Etsitzat zuten askok. Bere garaian igoera Tolosarentzat izango zela zioten bezala, Anaitasunarentzat izango zela zioten beste askok. Baina, beste behin ere, frogatuta geratu da futbolean edozer dela posible eta, emaitza txarrek ezlekura daramaten moduan, emaitza onek dagokion lekura itzultzen dutela etsitzen ez dena. Eta ia oharkabean, soinu askorik atera gabe, berriro ere lider da Tolosa.
Larunbatean erraz gailendu zitzaion Getariako Ketari. Seigarren minuturako Mario Zubelzuk penaltiz 1-0ekoa jarri zuen markagailuan. Zortzi minutu beranduago iritsi zen bigarren gola, Julen Vecinori esker. Eta atsedenaldiaren aurretik, Gorka Blancok 3-0ekoa sartu zuen. Aldagelara joan aurretik, lanak eginda.
Bigarren zatia lasaia izan zen, uneoro kontrolpean izan zuen partida Tolosak. Laugarren gol bat ere ikusteko parada izan zen. 68. minutuan sartu zuen Arrietak.
Ezustekorik handiena, ordea, igande iluntzean iritsi zen, Aloña Mendik Anaitasunari irabazi ziola jakitean. Modu horretara, sailkapeneko tartea jan dio Tolosak. Berdinduta dira orain lehen postuan, baina Tolosak irabazia du bien arteko lehia. Eta ia oharkabean lehian sartu dena Real Union izan da. Talde irundarra bi puntura baino ez dago, eta azken jardunaldian tolosarrek beren zelaian jokatu behar dute.
Tolosa, Anaitsuna eta Real Union. A ze hiru talde, azken lau jardunaldi zirraragarrietarako. Eta gero esango dute maila hau aspergarria dela!
| Pos. | Taldea | Puntuak | JP | IP | BP | GP | EA | AT | KT |
|---|---|---|---|---|---|---|---|---|---|
| 1 | TOLOSA C.F. | 61 | 30 | 19 | 4 | 7 | 0 | 62 | 30 |
| 2 | ANAITASUNA C.D. | 61 | 30 | 18 | 7 | 5 | 0 | 58 | 26 |
| 3 | REAL UNION CLUB SAD | 59 | 30 | 18 | 5 | 7 | 0 | 55 | 28 |
| 4 | MUTRIKU F.T. | 53 | 30 | 16 | 5 | 9 | 0 | 49 | 34 |
| 5 | HERNANI C.D. | 50 | 30 | 14 | 8 | 8 | 0 | 45 | 34 |
| 6 | ALOÑA MENDI KE | 49 | 30 | 14 | 7 | 9 | 0 | 44 | 37 |
| 7 | OIARTZUN K.E. | 47 | 30 | 14 | 5 | 11 | 0 | 40 | 30 |
| 8 | OSTADAR S.K.T. | 44 | 30 | 13 | 5 | 12 | 0 | 44 | 55 |
| 9 | TOURING C.D. | 42 | 30 | 12 | 6 | 12 | 0 | 38 | 34 |
| 10 | ZARAUTZ K.E. | 42 | 30 | 12 | 6 | 12 | 0 | 38 | 37 |
| 11 | ELGOIBAR C.D. | 39 | 30 | 12 | 3 | 15 | 0 | 33 | 40 |
| 12 | HONDARRIBIA F.E | 35 | 30 | 9 | 8 | 13 | 0 | 35 | 41 |
| 13 | MARTUTENE K.E. | 35 | 30 | 10 | 5 | 15 | 0 | 35 | 43 |
| 14 | BETI GAZTE K.J.K.E. | 34 | 30 | 9 | 7 | 14 | 0 | 36 | 43 |
| 15 | EUSKALDUNA S.D. | 30 | 30 | 8 | 6 | 16 | 0 | 28 | 59 |
| 16 | GETARIAKO KETA F.T. | 29 | 30 | 9 | 2 | 19 | 0 | 33 | 58 |
| 17 | ORDIZIA K.E. | 26 | 30 | 6 | 8 | 16 | 0 | 35 | 49 |
| 18 | ORIOKO F.T. | 23 | 30 | 6 | 5 | 19 | 0 | 27 | 57 |