Sorkunek azaldu digunez, abestietako hitzak "oso ilunak" dira. Eider Rodrigezek eginikoak dira gehienak, eta Harkaitz Canok ere idatzi ditu abesti batekoak. Disko honetan, rock-a alde batera utzi du Sorkunek, Kashbad taldearekin 2014. urtean eginiko bira eta gero, "zerbait berria" egin nahi baitzuen. Emaitza erritmo desberdinen batuketa, eta doinu dantzagarriz osaturiko diskoa. Hori bai, Kashbadekin edota Fermin Muguruzarekin gisa horretako erritmoak ere jorratu izan dituela dio.
Bere bizitzan nahiz musikan izandako aldaketa islatu nahi izan du lanaren izenarekin, "nolabaiteko metamorfosia izan baita". Diskoak izandako harrerarekin, bestalde, "oso gustura" dago musikaria, eta "pozik" dator Tolosara, "Bonberenean jotzea etxean jotzea bezala baita". Izan ere, bertan aritu ziren Kashbadekin grabaketa lanetan. Kontzertuari dagokionez, 'Ziklomorphosia' lana aurkeztuko du, eta tartean abesti ezagunak ere izango dira entzungai.