Asteburuan ekin zieten ospakizunei, baina gaurkoa da egun handia: San Blas eguna. Euriak eta aterruneak izan dira San Blasen, eta hortaz, bertatik ortzadarra ikusteko aukera ere izan da zenbait unetan.
Meza nagusia ospatu dute lepo bete den ermitan. Ermitaren kanpoan ere jendea pilatu da meza entzuteko. Amaieran, apaizak bertaratutako elikagaiak bedeinkatu ditu.
Ermitaren kanpoan, berriz, ohiturari jarraituz erroskillak eta kordelak erostera joan dira herritar ugari. Bedeinkatutakoak biak ere, eta kordelak eztarriko minei aurre egiten dietenak, gainera. Gainera, txorixo pintxoak eta tragoa hartzeko aukera ere aprobetxatu du jende askok.
Mezaren eta hamaiketakoaren ondoren, toka lehiaketa izan dute auzoko eta elkartekoentzat.
Festari amaiera arratsaldean emango diote. 18:30etik 21:30era Izer eta Alabier trikitilariak ariko dira San Blas egun hau girotzen. Honenbestez, agurtuko dituzte aurtengoz San Blas jaiak.
