Aurkari guztiek zer egin duten aurrez jakitea batzuetan okerrerako ere bihur daiteke. Are gehiago, ia emaitza guztiak, denak izan ez baziren, aldekoak izan zirenean. Aukera ederra zuen Tolosak pasa den asteko hutsaren ondoren berriro ere sailkapenean alde egiteko.
Zenbait unetan, garaipena lortzeko estutasuna izan zutela ere onartu zuen Justo Lillok partida amaieran: "Asko sufritu dugu, baina lortu dugu nahi genuena". Tolosak etekina atera zion jardunaldi borobil horri.
Ez zuen, ordea, erraza izan. Parean partida serioa jokatu zuen Martutene izan zuen. Donostiarrek espazio gutxi utzi zituzten, eta kostata iristen zen Tolosa. Atsedenaldian bi aldaketa egin zituen Lillok: Vecino eta Xabi Martinez kendu, eta Fuentes eta Loidi zelairatu zituen.
Hain zuzen, azken honek topatu zuen Martuteneren ateko giltza. Atzealdean egin zuten akats bati probetxu atera zion amezketarrak 58. minutuan. Hurrengo jokaldian bigarrena izan zuen Zabaletan, baina Mungia atezainak geldiketa bikaina egin zion.
Pixkanaka donostiarrak berdinketaren bila joan ziren, eta urduritasunak eragin zizkion kontraerasoak baliatzen zituen Tolosari. Lasaitasunaren gola luzapenean iritsi zen, berriro ere Loidiren hanketatik. Ezker hegaletik korrika saio eder baten ostean, bakar bakarrik atezainaren aurrean asmatu zuen. Duela bi aste berak sartu zituen Oiartzunen aurkako hiru golak, eta aste honetan ere bera izan da goleatzaile.
Amaieran, zoriona tolosarren aurpegietan. Izan ere, ez Anaitasunak, ez Ostadarrek, ez Hernanik, ez eta Real Unionek ere ez zuten garaipenik lortu. Bigarrenarekiko tartea sei puntura handitzeko balio izan dio. Aurrera!
| Pos. | Taldea | Puntuak | JP | IP | BP | GP | EA | AT | KT |
|---|---|---|---|---|---|---|---|---|---|
| 1 | TOLOSA C.F. | 41 | 18 | 13 | 2 | 3 | 0 | 45 | 20 |
| 2 | ANAITASUNA C.D. | 35 | 18 | 10 | 5 | 3 | 0 | 36 | 16 |
| 3 | OSTADAR S.K.T. | 33 | 18 | 10 | 3 | 5 | 0 | 30 | 27 |
| 4 | HERNANI C.D. | 31 | 18 | 9 | 4 | 5 | 0 | 26 | 21 |
| 5 | REAL UNION CLUB SAD | 30 | 18 | 9 | 3 | 6 | 0 | 33 | 21 |
| 6 | MUTRIKU F.T. | 30 | 18 | 9 | 3 | 6 | 0 | 28 | 27 |
| 7 | HONDARRIBIA F.E | 28 | 18 | 7 | 7 | 4 | 0 | 30 | 21 |
| 8 | TOURING C.D. | 27 | 18 | 8 | 3 | 7 | 0 | 19 | 16 |
| 9 | ALOÑA MENDI KE | 27 | 18 | 7 | 6 | 5 | 0 | 24 | 22 |
| 10 | ZARAUTZ K.E. | 25 | 18 | 7 | 4 | 7 | 0 | 23 | 19 |
| 11 | EUSKALDUNA S.D. | 22 | 18 | 6 | 4 | 8 | 0 | 18 | 36 |
| 12 | OIARTZUN K.E. | 21 | 18 | 7 | 0 | 11 | 0 | 18 | 23 |
| 13 | ELGOIBAR C.D. | 20 | 18 | 6 | 2 | 10 | 0 | 19 | 29 |
| 14 | BETI GAZTE K.J.K.E. | 20 | 18 | 5 | 5 | 8 | 0 | 23 | 28 |
| 15 | MARTUTENE K.E. | 17 | 18 | 4 | 5 | 9 | 0 | 19 | 24 |
| 16 | GETARIAKO KETA F.T. | 16 | 18 | 5 | 1 | 12 | 0 | 20 | 38 |
| 17 | ORIOKO F.T. | 15 | 18 | 4 | 3 | 11 | 0 | 16 | 31 |
| 18 | ORDIZIA K.E. | 15 | 18 | 3 | 6 | 9 | 0 | 22 | 30 |