18 urte beteko ditu abenduaren 23an Bonbereneak. Adin nagusitasuna... Gazteen eskarmentua... Iluntasuna ala argitasuna? lelopean, ospakizunetan murgilduta daude hilabetearen hasieratik, baina gaur ospatu dute egun handia.
Ospakizunak ere badu aldarrikapenetik, izan ere, urte latzak atzean utzita, egonkortzeari begira jarri baita Bonberenea. Hori dela eta, gazteek argitara emandako aldarrikapen mezu batean, honakoa eskatu diote Tolosako Udalari eta erakunde eskudunei: "Amaierara eraman dezatela aurreko Udalak Bonberenea dagoen tokian eta dagoen egoeran mantentzeko martxan jarri zuen prozesua".
Mila izan dira Bonbereneak jarritako proiektuak 18 urteetan. Adin nagusitasunarekin eta denbora horretan gazteek hartutako eskarmentuarekin, argitasuna ikusi nahi dute. Egindako lanak badu, gutxienez, beste 18 urte betetzeko bermea.