Hirugarren urtez, Eskola Agenda 21 proiektuaren barruan, Tolosako ikasleek Gabonetako apaingarriak sortu eta jarri dituzte herrian, berrerabilitako materiala erabiliz. Ur botilak, PVC hodiak, margoak, papera, kartoia... dena izan dute baliogarri.
Ohiko argidun apaingarrien beharra gutxitzea da asmoa, energia gastua ekiditeko. Izan ere Patxi Amantegi ingurumen zinegotziaren esanetan, munduaren tenperatura igotzen ari den honetan, "energia eta baliabide naturalak xahutzen ari gara, eta planetak mugak dituenez, kontsumo ohiturak aldatzera behartura egongo gara".
Bost ikastetxek hartu dute parte, eta horietako bakoitzak Tolosako txoko bat apaindu du:
- Hirukide: Zerkausia.
- Orixe Institutua: Plaza Berria
- Samaniego Ikastetxea: Berdura plaza
- Laskorain Ikastola: Euskal Herria plaza
- Inmakulada Ikastola: Kondeaneko aldapa
Amantegiren esanetan, "Tolosako ikastetxeek egin duten lanarekin argi geratzen da badela beste modu bat kaleak apaintzeko, energia gasturik eragin gabe eta lana eta ilusio asko jarriz".