Azken minutuan, eta gol olinpiar baten ondorioz, Tolosa CF-ek denboraldiko lehen partida galdu zuen larunbatean. Touring-en etxean jokatu zuen talde urdinak, eta 0-2 hasi ziren galtzen. «Ez dakit zer gertatu zen, jokalariekin hitz egin behar dut, baina ez ginen ongi hasi», zioen Lillo entrenatzaileak; «hala eta guztiz ere, lehen zatian golak sartzeko aukerak izan genituen, baina atsedenaldira horrela iritsi ginen». Bigarren zatirako aldaketak egin zituen entrenatzaileak, «eta hobeto jokatu genuen». Joko bolada on horrek saria izan zuen, eta Tolosa CF-ek markagailua berdintzea lortu zuen, Gorkaren eta Vecinoren golei esker. Hirugarren bat ere sartu zuten tolosarrek, baina epaileak bertan behera utzi zuen. Danbatekoa azken minutuan etorri zen.
Hurrengo partida igandean jokatuko du Tolosa CF-ek, Berazubin, 16:30etan Anaitasunaren aurka.