Ez zuen aurkari erraza Tolosak. Talde sendoa da Bidasoa Irun B, baina tolosarrek laugarren garaipena eskuratu zuten jarraian. Eta ez edonola, indar erakustaldia emanda baizik.
Lehen zatian parekotasun handia izan zen. Irundarrek 6:0ko defentsa sistema ezarri zuten eta etxeko taldeak zailtasun ugari izan zituen golak lortzeko. Erasoan, gainera, hainbat baloi galdu zituzten, eta Bidasoak hori baliatu zuen markagailuan aurretik jartzeko. 25. minutura arte horitxoek bat edo bi goleko abantaila izan zuten, baina etxeko taldeak defentsa puskatzea lortu eta atsedenaldira aurretik joatea lortu zuen: 11-10.
Bigarren zatiak aurrenekoaren tankera izango zuela zirudien. Berdintasuna zen nagusi, baina lan txukuna burutu ostean lehen hamar minutuetan hiru goleko errenta izatea lortu zuten Noguesen mutilek. 16-13. Ordutik aurrera, Tolosa nagusi izan zen.
Erritmo gehiago eman zion partidari etxeko taldeak, eta fisikoki nagusi izan ziren. Urtzi Otegik geldiketa bikainak egin zituen, eta Diaz De Ceriok, Iker Ortizek, Iñigo Arratibelek (4), Aritz Otegik eta Ander Urangak sartutako golek errenta hirukoiztera eraman zuten. Azkenean, 26-17, talde indartsua dela erakutsiz.
Sailkapenaren lehen postuan jarraitzen du honenbestez Tolosak, lau neurketak irabazita, Uharte nafarrekin berdinduta. Datorren asteburuan Gasteizen jokatuko du Gure Auzuneren aurka.
Bigarren taldearen lehen porrota
Bigarren nazional mailako taldeak ere aurkari gogorra hartu zuen Usabalen: Basauri. Uneoro markagailuan atzetik izan ziren urdinak. Bi goleko desabantailarekin eutsi zieten bizkaitarren 45. minutura arte. Baina defentsako akatsak eta presak garesti ordaindu zituzten etxekoek. Basaurik, bere atezainari esker, aldea zabaltzea lortu zuen, 20-29koarekin amaitzeko. Datorren asteburuan ere Gasteizen jokatuko du bigarren taldeak, bostgarren sailkatuaren aurka.