Jakoba Errekondo, Jone Gorostarzu eta Xabier Solano izan dira gaurko Sormenetik egitasmoari forma eman dioten hiru izen nagusiak. Horiekin guztiekin batera, ordea, Zerkausiko bi ekoizle, Joxi Ubeda eta Aiora Zulaika elkarrizketatzaileak nahiz bertaratu diren dozenaka ikus-entzulek ere osatu dute, hausnarketa eta gozatze prozesua.
Jakoba Errekondo elkarrizketatzailearen paperean aritu da gaur, eta ogi nahiz gazta ekologikoa ekoizten duten gizon-emakumeei galderak egin dizkie. Ez, soilik, baserriko lanaren inguruan; mundu horrek euskarari edo euskarak mundu horri emandako hiztegi aberatsa ere errepasatu dute, besteak beste.
Ekoizleen lana amaitutakoan, Jone Gorostarzuren txanda iritsi da. Des-egiten liburua besapean zuela iritsi da eta, aitortu duenez, "denboraldi batez itxita izan dut liburua". Gaur, horrela, bere sormen lanak berriro aireratu ditu poemen moldeetan. Sormenetik ekimenak pentsaraztea ere ekarri dio, Gorostarzu bera Xabier Solano musikari elkarrizketatzen aritu denetako bat izan baita: "Autoan hona bidean nentorrela, irratian Jakoba Errekondoren saioa entzun dut, eta zer pentsatu dut, kultura, hizkuntza eta nekazaritza ez daudela hain urrun bata bestearengandik. Elkar elikatzen dute, baina askotan ez gara konturatzen".
Xabier Solanok, berriz, Jone Gorostarzurekin batera, Aiora Zulaika pailazoa eta Joxi Ubeda musikaria izan ditu elkarrizketatzaile, norbere bizipenetatik sortutako galderekin.
Hausnarketa eta uztartze hori gertutik ezagutzera bertaratu direnek, gainera, Lurretik sukaldera postuko jakiak Zerkausi azpian dastatzeko aukera ere izan dute, Peñascal fundazioko gazteak aritu baitira Patxineko entsalada zerbitzatzen.