"Ez da egunik onena izan, eta pena da. Baina lagun handi batek esaten duen moduan, lau egun on izateko 100 txar pasa behar dira lehenago". Horiexek izan ziren txirrindulari tolosarrak bere estreinaldiaren ondoren Twitterren egindako adierazpenak.
Ez zen, ez, egunik onena izan San Sebastianentzat. 29,8 kilometroko ibilbidea osatu zuten 50 txirrindularietatik 45. amaitu zuen tolosarrak. Mads Wortz Schmidt danimarkarrak irabazi zuen proba, 37:10eko denborarekin. Hura baino lau minutu eta 24 segundo beranduago helmugaratu zen txirrindulari euskalduna.
San Sebastianek Munduko Txapelketa batean parte hartu duen lehen aldia izan da, eta debuta nahi bezalakoa izan ez arren, gustura azaldu da: "Erlojupekoa gogorra zen, eta bihurguneetatik ateratzerako orduan indarra falta izan zait. Hala ere, esperientziarekin gustura nago. Ikasteko balio izan dit".
Igandean errepideko lasterketa jokatuko du: "Atzoko egun txarrak balio dit errepideko lasterketa amorru gehiagorekin prestatzeko".