Ehunmiliak proban bi gune garrantzitsu daude, eta horietako bat Tolosako Usabal kiroldegian jarri dutena da. David Jaular bertako arduradunak azaldu duenez, Usabal kiroldegian aukera izan dute "hotel batean bezala egoteko, parte hartzaileek beraiek esaten dutenez. Leku estalia da, goxoa, ibilbideko beste batzuekin alderatuta, eta bertan izan dute jatekoa, dutxak, masajea, medikua... Motxilak ere utzi dituzte aurretik, eta arropaz aldatzeko aukera izan dute". Bestalde, ez da ezer larririk gertatu Tolosarako bidean; ohiko oinetako babak sendatu behar izan dituzte osasun zerbitzuetakoek.
10:30erako 180 pertsona pasatu dira Usabalgo gunetik, eta horietatik zazpik utzi dute proba. 04:06ean pasa da lehenengoa, Juan Carlos Sagastume Guatemalakoa. "Ez dago faboritoen artean, eta ezustekoa izan da. Oso ondo zegoen Tolosara iritsi denean", esan du Jaularrek. Imanol Aleson faboritoetako bat hirugarren pasa da, eta une honetan aurreneko postuan doa proban.
Tolosako guneaz gain, eskualdean beste lau daude Ehunmiliak proban: Zelatun, Jazkue gaina, Amezketa eta Txindoki.