Ero Etxe elkarte aktibo bat da Tolosan. Haurren krosa, Santa Ageda bezperako korua edota Astelenitako txaranga koloretsu eta alaia dira horren adibide. Baina bazuen arantzatxo bat: "San Joanetan hutsune bat zuen elkarteak, ez baitzuen era aktiboan parte hartzen" dio Ramon Artola lehendakariak.
Hutsune hori betetze aldera, aurten eskopetari konpainia sortu du elkarteak. Aurretik ere saiakera anitz egin baziren ere, orain arte ez zuten lortu konpainia osatzea. Bada, aurten adin ezberdinetako 70 gizon-emakume bilduko ditu. "Kopuru polita da, helburuak bete ditugu. Giro oso ona sortu da. Hurrengo urteetan ere zenbakia handitzea espero dugu", dio Imanol Zubelzu, ekainaren 24an guztien buru izango denak.
Bereziki bera eta bere arreba Joana aritu dira konpainia ateratzeko lanetan. "Aste Santu aurretik proposamen hori egin zioten zuzendaritzari, eta lan talde bat sortu zen" azaldu du Artolak. Bazkideen artean onespena izan zuen ideiak, eta aurrera egitea erabaki zuten.
Ramon Artolak gazteek egin duten lana azpimarratu du: "Elkartean adin aniztasun asko dago, baina konpainiarena gehienbat gazteek bultzatutako ideia izan da, eta poztekoa da".
Jantzia, logoaren isla
Jantzia egiteko, elkartearen logotipoan oinarritu dira. Zubelzuk azaldu duenez, "txalekoak bi kolore ditu, berdea eta grisa, logoaren antzera. Lepoko zinta ere pajaritaren isla da, eta inauterietako inbutuaren ordez, txapel gorria izango dute".