Inoiz ez zuen lortu Irene Caminosek Espainiako Kopan garaipenik. Baina ez 35ºko tenperaturak, ezta aurkari onenek ere, ezin izan zuten tolosarrarekin. "Oso pozik nago, behingoagatik lortu dut falta zitzaidana" azaldu du Caminosek.
Denboraldia bikain hasi du tolosarrak. Gipuzkoako Trialsin Txapelketako lau probak irabazi ostean, txapela jantzi zuen lehenengo, eta orain Espainiako Kopan nagusi izan da. Hurrengo hitzordua, maiatzaren bukaeran izango du Krakovian (Polonia). Bertan, Munduko Kopako lehen jardunaldia jokatuko da, eta pasa den urteko zortzigarren postua errepikatzeko helburuarekin ekingo dio txapelketari. "Lehen hamarren artean geratzea da nire helburua" dio. Poloniakoaren ondoren, Austrian eta Frantzian izango ditu probak, eta Belgikakoarekin amaituko da.