Olatz Peonek prentsa ohar bidez azaldu duenez, jeltzaleek abian jarritako parte hartze prozesuan gehien errepikatu den eskaera, Tolosan 5. edukiontzia ezartzearena eta zaborra egunero bota ahal izatearena izan dira, eta hortaz, horren aldeko apustua egingo dute jeltzaleek.
“Gure ustez gaur egungo sistemak ez du balio tolosarren beharrei erantzuteko, ez dator bat tolosarren ohiturekin eta edukiontzi kopurua ez da nahikoa eremu jakin batzuetan sortzen den hondakin kantitate handia jasotzeko" adierazi du Peonek. Horrez gain, "sistema berriak eragindako arazoak konpontzeko egungo gobernuak aldaketarik egin ez" duela salatu du.
Era berean, atez atekoa merkataritza eta ostalaritzatik kentzeko konpromisoa hartu du, eta ahal den neurrian, lurpeko edukiontziak berreskuratzekoa. "Azken eskaera hori da parte hartzeko prozesuan gehien errepikatu den eskaeretako bat".
Bestalde, EAJk "gardentasun handiagoa" eskatu du Mankomunitatetik egiten diren jarduerei dagokienez. "EH Bilduk ez ditu garaiz ematen Mankomunitatearen jarduerari buruzko datu ekonomikoak. Tolosar guztien eskura egon beharko luke informazio horrek, modu garden eta azkar batean".