Bidania-Goiatzen dagoen Iriarte Jauregia hoteleko Bailara jatetxeko Enrique Fleischmann sukaldaria izan da gaur, Tolosako azokan dagoen Lurraldetik Sukaldera gunean. Ez da bakarrik egon lantaldea eraman baitu bertara, eta tenperatura baxuan egindako arrautza egin du, zizekin, patatekin, babekin eta baratxuri saltsa batekin lagunduta.
Bailara jatetxeko Beñat Gereka komunikazio arduradunak azaldu duenez, arrautza 65 gradutan egin dute, pintxoari egitura berezia eman asmoz. Gerekak esan duenez, goizean goiz egon dira azokako postuak ikusten: "Postuz postu joan gara produktuak ikusi eta baserritarrekin hitz egiteko".
Bailarako ezaugarria garaian garaiko produktuak erabiltzea dela esan du eta horregatik dela ezinbestekoa baserritarrekin harreman zuzena edukitzea. "Produktuak hartzeko momenturik egokiena zein den jakiteko baserritarrekin hitz egin behar da, harreman zuzena oso garrantzitsua da, gaur goizean bertan baserritar batek produktu berri baten inguruan hitz egin digu... ezinbestekoa da baserritarrekin harreman zuzena edukitzea", esan du.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
