Tolosaldea Garatzeneko Migrazio Sailak eta Afrikar Batasuna elkarteak elkarlanean antolatu dute erakusketa, eta maiatzaren 16ra bitarte zabalik izango da. Gaur egin dute komunikabideen aurreko bisita, eta Ibai Iriarte Tolosako alkateak tresnatzat jo du erakusketa: "Argudio bat da eskualdean dugun kultura aniztasuna erakusteko".
Bide horretan, Migrazio Saileko Kristina Moralesek "estereotipoak atzean uzteko moduko irudiak" ikusgai izango direla azaldu du: "Komunikabideetan nahiz sarean Afrikaren inguruan erakusten dizkiguten irudiak, ia beti, oso bestelakoak izan ohi dira. Erakusketa honetan hamaika eta bat Afrika daudela ikusi ahal izango da, kontinente aberatsenetakoa dela ere bai, paisaia eta naturari dagokionez".
Beren aldetik, Afrikar Batasuna elkarteko kideek eskerrak eman nahi izan dizkiete erakundeei, beren helburuak azalduz: "Euskal Herrian etorkin bizi gara, eta elkartea sortu genuen guztiok elkartu eta babesa izateko. Horrela, afrikar kultura eta historia gure seme-alabei erakustearekin batera, euskaldunekin ezagutza trukatu nahi dugu. Oso pozik gaude erakusketarekin".
Horrenbestez, erakusketarekin batera, beste hainbat egitasmo prestatu dituzte eskualdean Kultura Aniztasunaren Nazioarteko Egunari begira eta, tartean, Alfons Rodriguez argazkilariaren bisita ere izango da, asteartean, erakusketan; bisitaren ondoren Afrikar Batasuna elkarteko kideek beren herrialdeko jakiak prestatu eta banatuko dituzte.