Topic-ek haurren opor egunak nola bete badaki, Pazko Astean egunero 09:00-13:00 bitartean txotxongiloen animazio ikastaroa eskaintzen ari baita.
Aurtengoan 6-14 urte bitarteko 15 neska-mutilek izena eman dute ikastaroan eta June Gerriko eta Miriam Sagarna Topic zentroko pedagogia departamentuko hezitzaileen laguntzaz film labur bat nola sortu ikasten ari dira.
Filmaren prozesu osoa egitea dute helburu; istorioa sortzetik hasi, pertsonaiak mamitzen jarraitu, plastilina eta bestelako elementuak erabiliz atrezzoa muntatu, fotogramaz fotograma filmatu eta azkenik ahotsa sartu. Etrokizuneko zuzendarientzat esperientzia baliagarria.
June Gerrikok azaldu bezala Topic-ek antolatutako ikastaro guztiak trinkoak dira, «haurrek prozesu guztia jarraian ikas dezaten», kasu honetan film labur bat nola egin ikastea da helburua. Behin prozesu osoa beteta, eta «denboraz garaiz bagabiltza, animazio mota ezberdinak ikasiko ditugu», azaldu du Topic-eko hezitzaileak.
Ikasleak eskulanetan aritzeaz gain atsedenerako tartea ere izaten dute Euskal Herria plazan.