Gipuzkoako Foru Aldundiaren 2015eko aurrekontuko egitasmoetako bat zen, Tolosa eta Anoeta arteko bidegorria egitearena. Aurrekontua, ordea, ez da onartu eta, beraz, partida bereziak sortu zituzten, proiektu estrategikoak aurrera eraman ahal izateko.
Zerrenda horretan txertatu zuten bidegorria egitearena, baina, zenbait eztabaidaren ondoren BBNNek ez dute onartu. Horren aurrean, Tolosako eta Anoetako udalek beren iritzia plazaratu nahi izan dute prentsa ohar bitartez: "Ez dugu ulertzen herritarrentzat horren garrantzitsua den egitasmo horren aurka nola bozkatu duten hiru alderdiek". Gainera, Tolosako udalbatzaren kasuan, aipatzekoa da bidegorriaren proiektuari zegokion testua aho batez onartu zutena plenoan.
Bi udalentzat ezinbesteko egitasmoa da, bi herrien artean oinez zein bizikletaz jende asko ibiltzen baita. Horrela, "alderdien interesak herritarren beharren gainetik" jarri izana leporatu diete, bi udalek, EAJ, PSE-EE eta PP alderdiei: "Lanean jarraituko dugu azpiegitura hori oso garrantzitsua delako, eta gauzatzea lortu behar dugulako".